ការអប់រំតាមរយៈសាលារៀន គឺជាសសរពិសេសមួយនៅក្នុងកិច្ចខិតខំប្រឹងប្រែងដើម្បីបង្កើតសង្គមមួយដែលមានសាសនា ភាពរុងរឿង និងរីកចំរើន។ ការអប់រំនៅក្នុងឥស្លាម គឺជាកាតព្វកិច្ចរបស់អ្នកឥស្លាម ទាំងបុរសនិងស្រ្តី ដែលមិនអាចខកខានបានឡើយ ដោយយោងទៅលើប្រសាសន៍របស់ព្យាការីមូហាំម៉ាត់ “ការស្វែងរកចំណេះវិជ្ជា គឺជាកាតព្វកិច្ច ឬជាបទបញ្ជា សម្រាប់អ្នកឥស្លាមទូទៅ ទាំងបុរសនិងស្រ្តី”
គោលដៅអប់រំរបស់ CACIG
១.បង្កើតអ្នកដែលមានអ៊ីម៉ាន តាក់វ៉ា អាកប្បកិរិយាល្អ និងមានចំណេះវិជ្ជា ដើម្បីជោគជ័យការរស់នៅក្នុងលោកិយ និងក្នុងបរលោក។
២.បង្កើតអ្នកតាក់វ៉ះដែលបំពេញភារកិច្ចរបស់ពួកគេដោយប្រើហ៊ីកម៉ះ ភាពទន់ភ្លន់ និងពោរពេញទៅដោយការលះបង់។
៣.បង្កើតថ្នាក់ជំនាញថ្មីៗ ដើម្បីអភិវឌ្ឍន៍ធនធានមនុស្ស និងកាត់បន្ថយភាពក្រីក្រ។
សាលារៀន CACIG
នៅក្នុងឆ្នាំ២០១៣ យើងបានបង្កើតសាលារៀនមួយ ដែលមានថ្នាក់សិក្សាចំណេះដឹងឥស្លាម និងទន្ទិញអាល់គូរអាន ដែលមានទីតាំងនៅភូមិជ័យសុខសាន្ត ឃុំត្រពាំងព្រីង ស្រុកតំបែរ ខេត្តត្បូងឃ្មុំ។
នៅក្នុងឆ្នាំ២០១៥ យើងបានសហការជាមួយសាលារៀន ដារូលអ៊ូលូម អាល់ហាស៊ីម៉ីយ៉ះ ដើម្បីបង្កើតថ្នាក់រៀនចំណេះដឹងឥស្លាម ថ្នាក់ទន្ទិញអាល់គូរអាន និងសាងសង់សាលារៀន និងម៉ាស្ជីទ ដែលមានទីតាំងនៅភូមិទី២ ឃុំកំពង់ទ្រាស ស្រុកក្រូចឆ្មារ ខេត្តត្បូងឃ្មុំ។
នៅក្នុងឆ្នាំ២០១៦ យើងបានសាងសង់សាលារៀន ឈ្មោះរ៉ៅដាតល់អ៊ូលូមអាត់ទីនីយ៉ះ សឹក្សាចំណេះដឹងឥស្លាមសម្រាប់កុមារនិងយុវជន មានទីតាំងនៅភូមិព្រែកតានង់ ស្រុកកោះសូទីន ខេត្តកំពង់ចាម។